Als Vorspann due n’i nöd abstriitä,
au i han än Hund a minärä Siitä.
Aber klar vertät ich gwüssermassä
d’Aaliggä a diä Menschärasse –
wo sich Hundehalter nennt
und savoir – vivrä nöd immer kennt.

Mengs Hundehalter hät sini Tückä,
wo eim wenig düänd beglückä.
Denn nöd nur dä vierbeinigi Kumpan,
zeigät bigoscht, was er so chann… 

Für jedä Hund, das isch jo klar,
isch s’Gassi goh ganz wunderbar.
Vor allem lainälos z’spazierä,
chann nur viil Freud garantierä. 

Nöd nur für dä Hund wird das zum Sägä.
Au am Meischter isch äs am Herzä glägä,
emol ä Bitzeli Abschtand überzcho
und sin Hund ächli Waltä z’loh. 

So isch äs denn leider nöd immer geh,
dass bim Nochber äs Lächlä chasch gseh,
wenn dä Fiffi schwanzwedelnd mit freudigäm Gebäll,
fremdi Komposchthüüfä duät umbudlä – easy und schnell. 

Au isch äs nöd megatoll,
wenn s’Hündli denn pfundet voll:
Gärtä, Wiesä, Trottoir und Co
und mäs eifach duät liggä loh. 

Mengs Augä vo dä Hundemeischter,
sind schiinbar allergisch uff Analkleischter,
wo ihren vierbeinigä Gsell
uusscheidät a jederä Stell. 

Anderscht chann i mir’s nöd erklärä,
um äs gwüssäs Mitleid chönnä z’gewährä.
Denn nur tränendi, juckendi Bindehüüt
chönnd d’Sehschärfi beiträchtigä wie nüüt. 

Drum isch es en guetä Vorwand,
wenn mä dä Hund nöd aagleint hät i sinärä Hand.
Z’viil Nööchi bim abgsondärätä Kot,
bringt eim villicht no i Atemnot… 

Allärgischi Schockzuäständ bi Hundehalter –
cha mä nöd bruuchä, egal i welem Alter!
Dä Nöchscht, wo chunnt sölls zemmäneh
oder denn äbä AU NÖD GSEH… 

D’Richtliniä für Hundebesitzer
beträffäd nöd d’Usländer, nöd d’Schwizer.
Sie sind demzufolge also kreiert,
zum Missachtä – unscheniert. 

Drum han i än guätä Tipp parat,
dä isch sicher im Wert vo 18 Karat:
„D‘Buässä und d’Roby – Dog nützäd weniger wie nüt,
aber villicht äs Hundehalteverbot für allergischi Lüüt.“

(Judith Bachmann)

nach oben

Zurück zur Übersicht Gedichte